Ut waar is unne gruwelijk kalde daag in de Miëterik. Ut waas
vurral gruwelijk kald vur de supporters langs de liën beej de wedstrijd vaan de
A1 vaan de Miëterik teage de A1 vaan Montagnards. Montagnards, un bescheide
club oet ut un durp daat Bergen hiët, stond un paar plekke onder os op de
rangliest. Weej wojje ut seizoen good afsloete, afsloete met 3 punten en met de
maximale punten vur de Champignonnen League.

Zoeals beej os un gewoente is, begonne we wer neet al te
good aan de wedstrijd. Door ‘n bal op de paol vaan ‘de Monties’ werde de
speulers vaan ‘de Mieut’ oet hun sloap ontwaakt. Dit kwaam neet allien door de
bal op de paol, maar ok door ut welbekende ‘gegodver’ langs de kant vaan meneer
de trainer, beater bekend als ien of andere Herman Teeuwen.

De ierste groete kans vanoet de kant vaan de Miëterik, kwaam
op de voot vaan Niels Houwen. Woar heej kos aflegge, de keeper oetpingele, de
bal in de goal legge of op de lat tikken (stiet ie wer veur teagenoaver
Tielen), schoot ie de bal teage de keeper aan. Ochja, heej wist toch wal daat
ie nog ging score deze wedstrijd.

Ut ging beater loepe beej de Miëterik. Tom Verbong en Niels
Houwen zoage beide daat ze beater de bal af koste legge daan vur eigen succes
goan, dit werkte. De twie speulers in de veurhoede vaan de Miëterik koste
elkaar blindelings vinden, woardoor er in de ierste helft maar lifst 4 goals
aan de kant vaan de Miëterik veele en nul komma nul aan de kant vaan
Montagnards. Umdaat ‘t trouwes nog steeds kald waar in de Miëterik en de
supporters hun tiënen neet mier veulde, vong de scheids daat weej wal un kopje
thië hejje verdind.

Noa allemoal un kopje thië, naja, un plastic beakerke thië
hejje gehad, hej ozze aanvoerder Tom Jenniskens nog ien of andere belangrieke
opmerking. We moste nog ien kier score en weej hejje wer de maximale punte vur
de Champignonnen League! Want zoeals bekend beej os, beer kaan veul doon met de
prestaties. In positieve zin kaan dit os inspireren tot beater voetbal, waornoa
weej beer kriege. In negatieve zin kaan dit os kapot make, doordaat weej dit
goedje teveul hebbe gehad de daag vaan teveure.

Men kos merke daat beej de Champignonnen League de
teagedoelpunte neet mejgereakend werde. In de twedde helft stong ut neet mier 4
teage 0, maar 4 teage 2. Meneer de trainer vond dit neet al te leuk mier en
wilde wer goals zien vaan ozze kant. Dit gebeurde ok. Bas Janssen, de jongste
vaan ut stel wist zien ierste goal vaan ut seizoen te vinde in de letste
wedstrijd vaan ut seizoen. Noadaat ok Basje vaan de nul af waar, mos er nog ien
iemand scoren: Ozze spits in de gojje alde tiëd: Koen Tielen. Pinch hitter
Tielen kwaam daan ok ut veld in en stond metien aan de basis beej un goal vaan
ozze kant. Woar Tielen ok de bal in de goal kos legge, of misschien zelfs teage
de lat aan kos scheete, woarnoa Tielen aan kop stond in de wedstrijd um ut latjetikken,
geafde heej de bal af aan Niels, woarnoa de eindstand werd bepaald op 6-2 vur
de Miëterik. Jammergenog hed Tielen nog steeds neet gescoord, achja, assists
zien net zoe belangrijk!

Noa deze overwinning op ‘de Monties’ hebbe weej ut seizoen
in stijl afgemaakt. Met 3 punten en met de maximale score in de Champignonnen
League. Beater kaan ut bijna neet! Naja, beater. Kampioen wuure is natuurlijk
altied beater, maar daat loate weej ovver aan ut volgend seizoen, tenminste ,
daat waar op de groepsbespreking gezagd!